‘अभिजित पानसे’ दिग्दर्शकाच्या भूमिकेत

शिवसेनेच्या भारतीय चित्रपटसृष्टीचे अध्यक्ष आणि लेखन- काव्य या क्षेत्रातील रसिक असलेले धडाडीचे नेते अभिजित पानसे प्रथमच दिग्दर्शकाच्या भूमिकेत प्रवेश करत सिनेमासृष्टीत पाऊल टाकणार आहेत. ‘रेगे’ या आगामी मराठी चित्रपटाचे दिग्दर्शन अभिजित पानसे करत असून या चित्रपटाचा मुहूर्त नुकताच खा. संजय राऊत यांच्या हस्ते कमालिस्तान स्टुडीओ येथे पार पडला.
‘द आर्टबीट’ या निर्मिती संस्थेद्वारे या चित्रपटाची निर्मिती होत असून ‘रेगे’ हा पहिलाच मराठी चित्रपट ते करत आहेत. डॉ. सुहास पंखे आणि श्री. अभिजित पानसे या चित्रपटाची निर्मिती करत आहेत.
प्रत्येक तरुण मुलाच्या आयुष्यात एक महत्वाचा टप्पा येतो, ज्यावेळी मनाला गोंधळवून टाकणारं वातावरण किंवा परिस्थिती त्याच्या समोर उभी राहते. पण या संभ्रमातून सारासार विचार आणि सद्सद विवेकबुद्धीच्या जोरावर निर्णय घेऊन जो या परिस्थितीला योग्य रितीने सामोरा जातो त्याचं आयुष्य पुढे नक्कीच उज्ज्वल असतं. “भारतीय विद्यार्थी सेनेचा अध्यक्ष म्हणून कामकाज पाहत असताना मला विविध वयोगटातल्या विद्यार्थ्यांना जवळून पाहता आलं. आणि अशा प्रकारच्या विषयावर आपण सिनेमा बनवावा असं मी निश्चित केलं. मला वाटतं सामाजिक संदेश ठळकपणे मांडण्यासाठी चित्रपट हे माध्यम आजच्या पिढीला आकर्षित करू शकतं,” अशी प्रतिक्रिया अभिजित पानसे यांनी व्यक्त केली. आरोह वेलणकर, पुष्कर श्रोत्री, संतोष जुवेकर, प्रवीण तरडे आणि महेश मांजरेकर अशा सर्व लोकप्रिय कलाकारांच्या अभिनयाने चित्रपट अधिक उत्कृष्ट होईल यात शंका नाही.
दबंग, हिरॉईन फेम महेश लिमये चित्रपटाचे छायांकन करत असून नवीन पिढीचे आवडते गायक, संगीतकार आणि दिग्दर्शक अवधूत गुप्ते या चित्रपटाचे संगीत दिग्दर्शन करणार आहेत. चित्रपटाची कथा- पटकथा आणि दिग्दर्शन अभिजीत पानसे करत असून संवाद अभिजित पानसे आणि प्रवीण तरडे यांनी लिहिले आहेत. संतोष फुटाणे कलादिग्दर्शनाची बाजू सांभाळणार असून रवींद्र करमरकर आणि शिवकुमार पार्थसारथी हे सहदिग्दर्शकाच्या भूमिकेत दिसणार आहेत. रत्नकांत जगताप हे या चित्रपटाचे कार्यकारी निर्माते आहेत.
‘द आर्टबीट’ निर्मिती संस्थेचा हा सिनेमा नववर्षाच्या मुहूर्ताला म्हणजेच २०१३ च्या जानेवारी महिन्यात प्रदर्शित केला जाणार आहे.