बर्लिन फिल्म फेस्टिवल मध्ये ‘दुस-या जगातली’ ची बाजी

राज्य पुरस्कारांच्या यादीमध्ये नाव मिळवून गौरवल्या गेलेल्या मराठी चित्रपटांच्या रांगेत आता अजून एका यशस्वी चित्रपटाची भर पडणार आहे. सतीश रणदिवे निर्मित आणि दिग्दर्शित ‘दुस-या जगातली’ या चित्रपटाची बर्लिन महोत्सवासाठी निवड करण्यात आली आहे. १५ ऑगस्ट पासून सुरू होत असलेल्या या बर्लिन महोत्सवामध्ये १७ ऑगस्टला बर्लिन मधील Padilon थिएटर मध्ये हा चित्रपट आंतरराष्ट्रीय स्तरावरील प्रेक्षकांचे मनोरंजन करण्यासाठी सज्ज होणार आहे. भारतातील विविध भाषांतील चित्रपटांचा यात समावेश असून मराठीतून ‘दुस-या जगातली’ ची निवड करण्यात आली आहे.
झी गौरव मध्ये नामांकन मिळवलेल्या, महाराष्ट्र राज्य शासनाचा उत्कृष्ट सामाजिक चित्रपट, उत्कृष्ट दिग्दर्शित चित्रपट आणि थर्ड आय एशियन इंटरनॅशनल फिल्म फेस्टिवल मध्ये सर्वोत्कृष्ट बालकलाकाराच्या भूमिकेसाठी गौरवली गेलेली ही ‘दुस-या जगातली’ आता बर्लिनवासियांचे मन जिंकून घेणार आहे. पसायदान चित्र निर्मिती संस्थेची निर्मिती असलेला हा चित्रपट ३ ऑगस्टला पुण्यात प्रदर्शित झाला असून १० ऑगस्टला मुंबईसह इतर राज्यात प्रदर्शित करण्यात येणार आहे. डॉ. भा.ल. पाटील यांच्या गाजलेल्या कादंबरीवर आधारित हा चित्रपट अनाथ मुलांच्या भावविश्वाचा वेध घेणारा आहे.
या चित्रपटात ज्येष्ठ दिग्दर्शक राजा परांजपे आश्रम चालकाच्या मुख्य भूमिकेत असून बालकलाकार वैष्णवी रणदिवे हिने ‘रमी’ या अनाथ मुलीची भूमिका साकारली आहे. जर्मन अभिनेत्री सुझेन बर्नेट आणि अमेरिकन अभिनेता नश नोबर्ट या परदेशी कलाकारांच्या अभिनयाने चित्रपट वास्तववादी झाला असून चित्रपटात मधु कांबीकर, नंदा रणदिवे, प्रमोद शिंदे, प्रसाद माळी, सेवा मोरे, मिलिंद ओक, दिलीप बापट, चंद्रकांत जोशी, पूजा पवार- साळुंखे या कलाकारांच्या महत्वपूर्ण भूमिका आहेत. अनाथ बाल संकुल कोल्हापूर मधील शेकडो अनाथ मुलींचाही चित्रपटात सहभाग आहे.
जर्मन अभिनेत्री सुझेन बर्नेट हि बर्लिन चित्रपट महोत्सवात या चित्रपटाचे प्रतिनिधित्व करणार आहे. या चित्रपटाच्या माध्यमातून मनोरंजनाबरोबरच एक अतिशय संवेदनशील सामाजिक विषय सतीश रणदिवे यांनी उत्तमरीत्या हाताळला आहे आणि या कलाकृतीतील संदेश प्रेक्षकांच्या मनापर्यंत अचूक पोहोचवला आहे असेच म्हणता येईल.