‘काकस्पर्श’ या सिनेमाच्या भरघोस यशानंतर महेश मांजरेकर आणखीन एक विलक्षण कहाणी प्रेक्षकांसमोर आणत आहेत. ‘ग्रेट मराठा एन्टरटेनमेंट’ प्रस्तुत ‘कुटुंब’ हा सिनेमा येत्या ३१ ऑगस्टला संपूर्ण महाराष्ट्रात प्रदर्शित केला जाणार आहे.
‘कुटुंब’ या नावातूनच एक आनंदी, प्रेमळ, माणसांनी सजलेले असं घर डोळ्यासमोर येतं. एकमेकांना निरपेक्षपणे सहकार्य करणारी, समोरच्याने न बोलता त्याच्या मनातले सारे काही समजणारी माणसं ज्या कुटुंबात असतील असं आदर्श कुटुंब प्रत्येकाचंच असायला हवं. अशाच एक प्रेमळ, आनंदी, संकटांवर मिळून मात करणा-या कुटुंबाची कथा ‘कुटुंब’ या सिनेमात रेखाटली आहे.
कुटुंब प्रमुखाच्या भूमिकेत असलेला नामदेव (जितेंद्र जोशी) आणि त्याची बायको गंगा (वीणा जामकर) यांचे हे छोटेसे कुटुंब. त्यांची दोन मुले सुभान (मिहीर सोनी) आणि लक्ष्मी (गौरी इंगवले) यांच्याबरोबर सिद्धार्थ जाधव आणि मानसी नाईक यांची धम्माल जोडी या चित्रपटात आपल्याला पाहता येईल. जितेंद्र जोशी आणि मानसी नाईक यांचा एक वेगळाच लूक या चित्रपटात आहे. कुटुंबासाठी आणि आपल्या मुलांच्या इच्छा पूर्ण करण्यासाठी कोणतीही गोष्ट करण्याची तयारी असलेला नामदेव कशा रीतीने आर्थिक संकटांचा सामना करून त्याचे कुटुंब सांभाळतो याचे चित्रण सिनेमात आहे.
एका पेक्षा एक फेम मिहीर सोनी प्रथमच या चित्रपटातून रुपेरी पडद्यावर झळकणार आहे.या चित्रपटाची कथा- पटकथा महेश मांजरेकर यांची असून संवाद प्रवीण तरडे यांचे आहेत. जितेंद्र जोशी आणि बाबा चव्हाण यांच्या गीतांना अजित-समीर आणि अभिजित कवठलकर यांनी संगीत दिले आहे. रूपकुमार राठोड, अवधूत गुप्ते, बेला शेंडे आणि अजित परब यांनी ही गाणी गायली असून उमेश जाधव यांनी नृत्यदिग्दर्शन केले आहे.
इच्छाशक्ती आणि व्यापक कुटुंबाचे सहकार्य यामुळे दोन चिमुरड्यांनी घेतलेली ही उंच भरारी प्रेक्षकांना ३१ ऑगस्टपासून पाहता येईल.
No comments:
Post a Comment