‘दि स्ट्रगलर्स – आम्ही उद्याचे हिरो’

जन्माला येणारा प्रत्येक माणूस कोणत्या ना कोणत्या क्षेत्रात स्ट्रगल अनुभवत असतो. मुळात स्ट्रगल हा प्रकार प्रत्येक क्षेत्रात आहे. आजकाल आयुष्यातील प्रत्येक गोष्ट, प्रत्येक पायरी, प्रत्येक प्रमोशन किंवा प्रत्येक अधिकार हा स्ट्रगलशिवाय मिळत नाही. हे १००% वास्तव आपण नाकारू शकत नाही. त्याचप्रकारे फिल्म इंडस्ट्रीतही फार मोठ्या प्रमाणावर स्ट्रगल करावे लागते. रुपेरी पडद्यावर येण्यासाठी बरेचसे कलाकार जीवाचा आटापिटा करताना आपल्याला दिसतात. फक्त एक संधी मिळावी यासाठी हे कलाकार वाट्टेल ते करण्यासाठी तयार असतात. मग अशाच कलाकरांचा गैर फायदा घेणारे ठग सुद्धा या क्षेत्रात पावला पावलावर आढळतात. आपल्या स्वप्नांच्या मागे बेभान होऊन भरकटलेल्या अशा कलाकारांचं आणि त्यांच्या पालकांचं स्ट्रगल, वर्षानुवर्षे या क्षेत्रात मोलाचे काम करूनही आयुष्याच्या शेवटी पुन्हा स्ट्रगलरच, अशाच काही फिल्म इंडस्ट्रीतल्या नवोदित कलाकारांच्या स्ट्रगल वर टाकलेला हा सुवर्ण प्रकाश “दि स्ट्रगलर्स – आम्ही उद्याचे हिरो”.
‘दि स्ट्रगलर्स – आम्ही उद्याचे हिरो’ हा चित्रपट तयार असून प्रदर्शनाच्या वाटेवर आहे. या चित्रपटात प्रमुख भूमिकेत चिन्मय मांडलेकर, दिपाली मांडवकर तसेच संजय मोने, उदय सबनीस, प्रिया बेर्डे, सचिन आवटे सुनील देव, प्रकाश धोत्रे, अक्षय वाघमारे, संदेश गायकवाड, रणजीत घरत, विजय गीते, मानसी देवळेकर आदी मध्यवर्ती भूमिकेत आहेत. कथेला साजेशी असलेली गीते आणि नवोदित संगीतकार अनुराग गोडबोले यांचे सुमधुर संगीत ही या चित्रपटाची वैशिष्ट्ये आहेत. बॉलीवूड मधील सुप्रसिद्ध गायक कुणाल गांजावाला तसेच ‘सारेगम’ फेम राहुल सक्सेना, अनघा ढोमसे तसेच ‘आता होऊन जाऊ दे’ चा विजेता आदर्श शिंदे यांनी या चित्रपटाची गाणी स्वरबद्ध केली आहेत. या चित्रपटाचे चित्रीकरण पुणे, कर्नाळा स्पोर्ट्स अकॅडमी, पनवेल आणि अहमदनगर येथे झाले असून तेथील स्थानिक नवोदित कलाकारांना देखील चित्रपटात काम करण्याची संधी मिळाली आहे. गंभीर अशा वास्तववादी विषयावर मार्मिक विनोदाची झालर या चित्रपटात पाहता येईल. मागील वर्षी प्रदर्शित झालेल्या रॅगिंग या चित्रपटानंतर लेखक दिग्दर्शक विजय शिंदे यांचा हा दुसरा आशयपूर्ण सिनेमा प्रदर्शनासाठी सज्ज असून लवकरच जवळच्या सिनेमागृहात पाहता येईल.