मराठी चित्रपटांना मल्टीप्लेक्समध्ये बंदी

एका हिंदी चित्रपटाच्या प्रदर्शनासाठी १५ ऑगस्ट पासून राज्यभरातील सर्व मल्टीप्लेक्समध्ये मराठी चित्रपटांवर अघोषित बंदी घालण्यात आली आहे. शिवसेना आणि मनसे यांनी या अन्यायाचा निषेध करत त्याविरुद्ध आवाज उठवला आहे. ‘एक था टायगर’ या चित्रपटाला राज्यभरातील सर्व शो हवे असल्यामुळे राज्यातील सर्व मल्टीप्लेक्समध्ये मराठी चित्रपटांसाठीची दारे बंद करण्यात आली आहेत, असं चित्रपट वितरणातील सूत्रांनी सांगितले आहे.
‘देऊळ’चे निर्माते अभिजित घोलप यांच्या नुकत्याच प्रदर्शित झालेल्या ‘भारतीय’ या चित्रपटाला बंदीचा पहिला फटका बसला आहे. या अन्यायाविरुद्ध चित्रपटातील सर्व कलाकारांची टीम उद्या लोअर परेल येथील पीव्हीआर फिनिक्स मल्टीप्लेक्स मालकांची भेट घेणार आहे. शिवसेना आणि मनसे यांनी या लढाईत प्रवेश केला असून त्यांनी शासनाला २४ तासांची डेडलाईन दिली आहे. यानंतरही मराठी चित्रपटांवर होत असलेला अन्याय न थांबल्यास तीव्र आंदोलन छेडण्याचा इशारा त्यांनी दिला आहे.
हवामान, पाणी टंचाई, शेती समस्या, पेट्रोलच्या दरांची चढ उतार अशा वास्तववादी आशयावर आधारलेल्या ‘भारतीय’ या चित्रपटाचे, राज्यभरात २०० सिनेमागृहात २५० शो सुरु आहेत. पण आता मल्टीप्लेक्समध्ये मराठी चित्रपटांवर बंदी घालून आपल्याच राज्यात इतर चित्रपटांना परवानगी मिळतेच कशी, असा सवाल चित्रपटाचे निर्माते अभिजित घोलप यांनी केला आहे.
“मल्टीप्लेक्स मालकांना २४ तासांची मुदत दिली जाईल. त्यानंतरही हालचाल न केल्यास मनसे स्टाईल ‘खळ्खट्याक’ आंदोलन केले जाईल.” असा इशारा मनसे चित्रपट सेनेचे अध्यक्ष अमेय खोपकर यांनी दिला आहे.
“भारतीय चित्रपटाच्या समूहाशी आमचे बोलणे झाले. त्यासंबंधी आधीच लोअर परेल येथील पीव्हीआर फिनिक्स मल्टीप्लेक्स मालकांना आम्ही पूर्वसूचना दिल्या आहेत. तरीही चित्रपटांवर बंदी घातली तर योग्य ती कारवाई केली जाईल ” असे भारतीय चित्रपट सेनेचे अध्यक्ष अभिजित पानसे यांनी स्पष्ट केले आहे.