मल्टीप्लेक्स चित्रपटगृहात नुकताच प्रदर्शित झालेला भारतीय हा मराठी चित्रपट काढून हिंदी चित्रपट दाखवण्याच्या तयारीत असलेल्या मल्टीप्लेक्स चालकांना महाराष्ट्र नवनिर्माण चित्रपट कर्मचारी सेनेचा दणका बसल्यानंतर भारतीय या मराठी चित्रपटाचे खेळ प्राईम टाईममध्ये दाखविण्यात येतील असे मल्टीप्लेक्स व्यवस्थापनांकडून सांगण्यात आले. मल्टीप्लेक्स व सिंगल स्क्रिन चित्रपटगृहामध्ये मराठी चित्रपटांना प्राईम टाईम मिळत नाही, अशी तक्रार ‘भारतीय’ या चित्रपटाचे निर्माते अभिजित घोलप यांनी महाराष्ट्र नवनिर्माण चित्रपट कर्मचारी सेनेकडे केली. याविषयाची दखल घेत महाराष्ट्र नवनिर्माण चित्रपट कर्मचारी सेनेच्या वतीने मल्टीप्लेक्स चित्रपटगृह चालकांच्या विरोधात आंदोलन छेडण्यात आले. महाराष्ट्र नवनिर्माण चित्रपट कर्मचारी सेनेच्या शिष्टमंडळाने मल्टीप्लेक्स चित्रपट व्यवस्थापनेला या बाबतचे पत्र दिले. मराठी चित्रपट प्रत्येक आठवड्यात प्राईम टाईममध्ये दाखवले गेले नाहीत तर महाराष्ट्र नवनिर्माण सेनेतर्फे तीव्र आंदोलन छेडण्यात येईल आणि याची संपूर्ण जबाबदारी मल्टीप्लेक्स चालकांची असेल असा इशारा महाराष्ट्र नवनिर्माण चित्रपट कर्मचारी सेनेचे अध्यक्ष अमेय खोपकर यांच्याकडून देण्यात आला. शासन निर्णयानुसार मल्टीप्लेक्स चित्रपट गृहामध्ये मराठी चित्रपट दाखवणे हे बंधनकारक आहे. परंतु, मल्टीप्लेक्स चित्रपटगृहांमध्ये या नियमाचे पालन करण्यात येत नाही, तसेच शासन सुद्धा या मल्टीप्लेक्स चित्रपटगृहांच्याबाबत कठोर कारवाई करत नाही. जर असेच चालत राहिले तर महाराष्ट्र नवनिर्माण चित्रपट कर्मचारी सेना आपल्या पद्धतीने याबाबत तोडगा काढेल असे महाराष्ट्र नवनिर्माण चित्रपट कर्मचारी सेनेच्या सरचिटणीस शालिनी ठाकरे यांनी सांगितले. मनसेच्या आक्रमक भूमिकेनंतर मल्टीप्लेक्स चित्रपट गृहाच्या व्यवस्थापकांनी मराठी चित्रपट प्राईम टाईममध्ये दाखवले जातील असे लेखी पत्रक दिले. या प्रसंगी मराठी चित्रपट सृष्टीतील अभिनेते महेश कोठारे, मकरंद अनासपुरे, जितेंद्र जोशी, अभिजित घोलप व महाराष्ट्र नवनिर्माण चित्रपट सेनेचे व स्थानिक मनसेचे पदाधिकारी उपस्थित होते.
No comments:
Post a Comment