हृदयस्पर्शी ‘दुस-या जगातली’

मेघराज राजेभोसले आणि वैभव जोशी यांच्या ‘नलिनोत्तम पांडव’ तर्फे एक अतिशय हृदयस्पर्शी चित्रपट प्रेक्षकांच्या भेटीला आला आहे. महाराष्ट्र राज्य चित्रपट महोत्सवामध्ये यावर्षीचा सर्वोत्कृष्ट सामाजिक व उत्कृष्ट दिग्दर्शित म्हणून गौरवण्यात आलेला निर्माते- लेखक- दिग्दर्शक सतीश रणदिवे यांचा ‘ दुस-या जगातली’ हा भावनाप्रधान चित्रपट प्रेक्षकांना नक्कीच आवडेल.
डॉ. भा.ल. पाटील यांच्या ‘दुस-या जगातली’ या गाजलेल्या कादंबरीवर हा चित्रपट आधारला आहे. अनाथ मुलींच्या भावविश्वावर मायेची नजर फिरवणारी या चित्रपटाची कथा आहे.
आपल्या जन्मदात्याच्या प्रतीक्षेत आयुष्यभर त्याच्या वाटेकडे डोळे लावून बसणारे निष्पाप जीव, कच-याच्या कुंडीत कुत्र्या- मांज-याचं भक्ष्य बनण्यासाठी फेकून दिलेले दुर्दैवी जीव, या अश्राप जीवांचे संगोपन करणारे आश्रम या सा-या हृदयद्रावक वास्तवाची कथा या चित्रपटात सांगितली आहे. वयाची १८ वर्षे पूर्ण झाल्यानंतर कायद्याने हे मुले आश्रमावर अवलंबून राहू शकत नाहीत, त्यामुळे या मुलांचे भविष्य सुरक्षित राहावे म्हणून त्यांना हक्काचे आईवडील मिळवून देण्यासाठी आश्रमातील सेवाभावी सुजनांची धडपड या चित्रपटात रेखाटली आहे.
आपल्या सहज सुंदर अभिनयाने प्रेक्षकांना भुरळ घालणारे, जुनेजाणते आणि मराठी चित्रपटसृष्टीला ऋषितुल्य असणारे सुप्रसिद्ध दिग्दर्शक ‘राजदत्त’ हे या चित्रपटात ‘आबा’ या आश्रम चालकाच्या प्रमुख भूमिकेत प्रेक्षकांना दिसणार आहेत.
झी गौरव मध्ये नामांकित झालेली आणि थर्ड आय एशिअन इंटरनेशनल फेस्टिवल मध्ये उत्कृष्ट बालकलाकार म्हणून गौरवण्यात आलेली वैष्णवी रणदिवे ‘रमी’ ही या चित्रपटात अनाथ मुलीची भूमिका करत आहे. आश्रमातील एका उपक्रमाअंतर्गत दिवाळीच्या सणानिमित्त काही दिवसांसाठी तिला पाहुणी म्हणून एका घरी पाठविले जाते. त्या कुटुंबवत्सल घरामध्ये मायेची उब तिला मिळते. आई, वडील, बहिण, भाऊ या नात्यांना पारखी झालेल्या तिला तिच्या आयुष्यातल्या रिकाम्या जागांची जाणीव त्या घरात होते. या उपकथानकाला वेगळं वळण देणारं परदेशी दत्तक प्रकरण या चित्रपटात दाखवण्यात आले आहे. जर्मन अभिनेत्री सूझेने आणि अमेरिकन अभिनेता नाश नोबर्त या परदेशी कलाकारांच्या अदाकारीने चित्रपटाला अधिक वास्तव स्वरूप दिले आहे.
या चित्रपटाचे संपूर्ण चित्रीकरण जयप्रभा स्टुडीओ, कोल्हापूर येथे झाले आहे. मधु कांबीकर, नंदा रणदिवे, प्रमोद शिंदे, प्रसाद माळी, सेवा मोरे, मिलिंद ओक, दिलीप बापट, चंद्रकांत जोशी, पूजा पवार- साळुंखे यांच्यासह अनाथ बाल संकुल कोल्हापूर येथील शेकडो अनाथ मुलींनी या चित्रपटात सहभाग घेतला आहे. या चित्रपटातील गाणी मधुकर आरकडे यांनी लिहिली असून शशांक पवार आणि मनोहर गोलांबरे यांनी गीतांना संगीत दिले आहे. चित्रपटाचे छायांकन-शरद चव्हाण, संकलन- विजय खोचीकर, पार्श्वसंगीत- महेश नाईक, कला- सतीश बीडकर, रंगभूषा- सुनील मुसळे, वेशभूषा- सुभाष कांबळे यांची आहे.कुटुंबाच्या प्रेमळ हाकेसाठी आसुसलेली ‘ दुस-या जगातली’ ती प्रेक्षकांना नक्कीच भावेल.