आयुष्याच्या वाटेवर चालणा-या तमाम वाटसरूंना अनुभवांच्या साथीने बळ मिळतं ते आपल्या आधी काही क्षण जास्त आणि वेगळा रस्ता चाललेल्यांकडून…..यशस्वी, शून्यातून विश्वाची निर्मिती करणा-या, आपल्या इच्छा शक्तीच्या जोरावर प्रारब्धावर मात मिळवलेल्या व्यक्तींचे आत्मचरित्र म्हणजे अंधारात सापडलेल्या वाटसरूंना प्रकाशाची आशा दाखवणारे ठरते. आणि म्हणूनच कॅन्सरसारख्या रोगाच्या तावडीतून सहीसलामत सुटून टीम इंडिया मध्ये पुन्हा सामील झालेला ‘युवराज सिंग’ आत्मचरित्र लिहिणार आहे. ‘इन डिफरन्ट फॉर्म’ या त्याच्या आत्मचरित्रातून कॅन्सरशी झालेली त्याची लढाई तो सर्वांपर्यंत पोहोचवणार आहे.
क्रिकेटच्या मैदानावर यशस्वी खेळी खेळणारा युवराज, वर्ल्ड कप मध्ये भव्य यश मिळवून दिल्यानंतर जणू गायब झाला होता. त्याच्या या उज्ज्वल यशावर काळोख पसरवणारा कॅन्सर समोर आल्यावर मात्र युवीच्या तमाम चाहत्यांनी त्याच्या सुदृढ आयुष्याबद्दल प्रार्थना सुरु केल्या होत्या. आणि सर्वाच्याच आशीर्वादाने थेट अमेरिकेत उपचार घेतल्यानंतर सर्वांचा लाडका युवी आज पुन्हा नव्या उमेदीने मैदानावर उतरण्यास सज्ज झाला आहे. इतर कॅन्सर झालेल्या रुग्णांना प्रेरणा देणारं त्याचं आत्मचरित्र लवकरच प्रकाशित होणार आहे. कॅन्सरचं निदान झाल्यानंतर युवराजने भारतातील कॅन्सरग्रस्त रुग्णांची माहिती काढली. कॅन्सरग्रस्तांच्या यादीत आपले नाव जाऊन आज आपण सहीसलामत बाहेर आल्यामुळे त्या रोगाने ग्रासलेल्या माणसांची मनस्थिती, त्यांच्या वेदना यांचा युवीला अनुभव आहे. वर्ल्ड कप ते कॅन्सर या दोन वर्षांच्या काळामध्ये एक अनपेक्षित अध्याय युवीच्या आयुष्यात आला ज्याने त्याच्या आयुष्याला वेगळंच वळण दिलं. त्यामुळे इतर कॅन्सर झालेल्या रुग्णांना प्रेरणा देणारं त्याचं आत्मचरित्र लवकरच प्रकाशित होणार आहे. ज्या संस्थेने लान्स आर्मस्ट्राँगचे पुस्तक प्रकाशित केले तीच संस्था युवीचे हे आत्मचरित्र प्रकाशित करणार आहे.
नवी दिल्लीतील ‘Random House’ या प्रकाशन संस्थेतर्फे ‘इन डिफरन्ट फॉर्म’ प्रकाशित केले जाणार असून १२ डिसेंबर २०१२ रोजी हे पुस्तक बाजारात येणार आहे.
No comments:
Post a Comment