‘सिल्व्हर स्क्रीन एंटरटेनमेन्ट’ या बॅनरखाली ‘परीस’ या मराठी चित्रपटाची निर्मिती करण्यात येत आहे. सौ. सीमा शरद या चित्रपटाच्या निर्मात्या आहेत. आपल्या आयुष्याला सोनेरी रंगानेच नाही तर सुवर्ण गुणांनी उज्ज्वल करणारा हा परीस प्रत्येकाच्याच आयुष्यात काही तरी देऊन जातो. आपल्या नकळत आपल्या उत्कर्षासाठी अनेक गोष्टी कारणीभूत ठरत असतात, ज्यांना आपण या परिसाची उपमा देऊ शकू. त्याची रूपं वेगवेगळी असतील- कोणासाठी ते आई वडिलांनी केलेले संस्कार असतील, कोणासाठी गुरुंनी दिलेले ज्ञान असेल, तर कोणासाठी अनुभवांची शृंखलाच या परिसाचे कार्य करेल…..’परीस’ हा चित्रपट एका महत्वाकांक्षी मुलाला शिक्षणरुपी परीसस्पर्श होउन त्याचे आयुष्य कसे घडवतो याची कथा सांगणारा आहे.
दिग्दर्शक रमेश साळगांवकर यांच्या मार्गदर्शनाखाली उदय सबनीस, अजय पाध्ये, प्रदीप पटवर्धन आणि कोमल आपटे यांच्यावर चित्रपटाचे मुहूर्त दृश्य चित्रित करण्यात आले. चहाच्या टपरीवर काम करणारा एक गरीब मुलगा शिक्षणाच्या ओढीने त्याचा ध्यास घेतो. त्यासाठी अपार कष्ट आणि मेहनत करून यशाच्या शिखरावर पोहोचतो याचे प्रेरणादायी चित्रण या चित्रपटात केले आहे. शरद कुमार प्रस्तुत ‘परीस’ साक्षरतेबाबत जागरूकता वाढवणारा चित्रपट आहे. चित्रपटाची कथा- पटकथा- संवाद आणि छायाचित्रण अशी बहुरंगी कामगिरी सुनील खरे करत आहेत. उमेश कामत, निशा परुळेकर, उदय सबनीस, अजय पाध्ये, प्रदीप पटवर्धन, राजू शिसदकर आणि कोमल आपटे या कलाकारांचा अभिनयही प्रेक्षकांना या चित्रपटात पाहता येईल.
No comments:
Post a Comment