लवकरच प्रेक्षकांच्या भेटीला 'स्वर्गाचा व्हिजा'.

निर्माते रमेश धीरज सिंह यांनी धीरज एंटरटेन्मेंटच्या बॅनरखाली 'स्वर्गाचा व्हिजा' ह्या कौटुंबिक, विनोदी चित्रपटाची निर्मिती केली आहे. दिग्दर्शक राकेश बरोट व शैलेंद्रसिंह राजपूत यांनी हा चित्रपट दिग्दर्शित केला आहे. 'स्वर्गाचा व्हिजा' नावावरुन ह्या चित्रपटाचा फँटसी आशय लक्षात येतो. थोडी फार अदभूततेची जोड घेऊन ह्या चित्रपटाचं कथानक विणलं गेल आहे. याचं लेखन राकेश बरोट ह्यांच असून गीतरचना प्रमोद गायकवाड व जयसिंह विजयसिंह यांची आहे. ध्रुवजीत रॉय या बंगाली तरुणाने ह्या गीतरचना संगीतबद्ध केल्या आहेत.

'स्वर्गाचा व्हिजा' मध्ये मोहन जोशी, मिलिंद गुणाजी, योगेश महाजन, किशोर नांदलासकर, आनंद अभ्यंकर, डॉ. विलास उजवणे, दिपज्योती नाईक ह्या दिग्गज कलाकारांबरोबरच कोमल ढिल्लो, रुपाली गायकवाड, राकेश बरोट, रमेश डी. सिंह, प्रवीण वाडकर, सोनी सिंह, मिली तांबे व निलम यांच्या प्रमुख भूमिका आहेत. एक निखळ करमणूक करणारा चित्रपट लवकरच महाराष्ट्रात एकाचवेळी प्रदर्शित होत आहे.