दक्षिण आशियाई चित्रपट महोत्सवामध्ये 'उदय' करणार मराठी सिनेसृष्टीचे प्रतिनिधित्व.

१५ ते १८ सप्टेंबर २०११ या कालावधीत गोव्यातील पणजी येथे दक्षिण आशिया फिल्म फेस्टिव्हल संपन्न होणार आहे. या महोत्सवामध्ये दक्षिण आशियातील विविध देशांमधील वेगवेगळ्या भाषांमधील हजारो चित्रपटांमध्ये 'उदय' या मराठी चित्रपटाला मराठी सिनेसृष्टीचे प्रतिनिधीत्व करण्याची संधी मिळाली आहे. पणजी येथील कला अकादमीमध्ये दुपारी ३ वाजता 'उदय' चित्रपटाचा शो सादर केला जाईल. 

गोव्याची पार्श्वभूमी असलेल्या आणि अस्सल कोकणी माणसाच्या जीवनावर प्रकाशझोत टाकणार्‍या 'कलाक्षेत्र बॅनर'ची निर्मिती असलेल्या 'उदय' या मराठी चित्रपटाचे चित्रीकरण नुकतेच गोव्यात पूर्ण झाले.

निर्माते प्रविणकुमार पासी यांची ही पहिलीच मराठी निर्मिती आहे. कथा-पटकथा आणि दिग्दर्शन जितेंद्र शिकेरकर यांचे असून संवाद युवराज पाटील यांचे आहेत. या चित्रपटाद्वारे राम यशवर्धन हा नवोदित चेहरा मराठी चित्रपटसृष्टीत पदार्पण करीत आहे. राम यशवर्धनसह या चित्रपटात अविनाश नारकर, संपदा जोगळेकर- कुलकर्णी, तेजश्री प्रधान, शरद पोंक्षे, किशोर नांदलस्कर, आनंदा कारेकर, अरुण कदम, अनिरुद्ध हरीप, संजय मोहिते यांच्या प्रमुख भूमिका असून  विनय आपटे पाहुण्या कलाकाराच्या भूमिकेत दिसणार आहे.