अशोक पत्की यांनी ७१ व्या वर्षात पदार्पण केल्याबद्दल हरिभाऊ विश्वनाथ कंपनी आणि फाऊंटन म्युझिकच्या वतीने 'स्वर-७१' या कार्यक्रमाचे आयोजन केले होते. सुरेश वाडकर, श्रीधर फडके, देवकी पंडीत, डॉ. विजया वाड आदी मान्यवरांच्या उपस्थितीत हा कार्यक्रम दादर्-माटुंगा येथील यशवंत नाट्यमंदीर येथे रंगला. पं. अजय पोहनकरांच्या हस्ते पत्की यांचा शाल, श्रीफळ व स्मृतीचिन्ह देऊन सत्कार करण्यात आला. या कार्यक्रमाच्या निमित्ताने पत्की यांनी संगीतबद्ध केलेल्या 'शुभंकर श्रीगणेशा', 'झिम्म्ड झिम्मड' आणि 'सावळ्या घना' या तीन म्युझिक अल्बमचे प्रकाशन अनुक्रमे डॉ. विजया वाड, देवकी पंडित व सुरेश वाडकर यांच्या हस्ते झाले. या कार्यक्रमाचे सूत्रसंचालन संदिप कोकिळ व स्मिता गवाणकर यांनी केले.
स्पॉटबॉयपासून ते चित्रपट लेखनाचा प्रदिर्घ अनुभव घेतल्यानंतर अभिजीत पाटील व भुपेंद्र पाटील या दोन तरुणांनी मुहुर्तमेढ केलेल्या 'श्री गणेश इंटरनॅशनल फिल्म्स' निर्मित तीन चित्रपटांपैकी "आयुष्य" या सर्वसामान्य माणसांच आयुष्य व्यतीत करणार्या चित्रपटाचा मुहुर्त नुकताच डहाणु येथील वाणंगाव जिल्ह्यातील दामोदर निवास या बंगल्यात अगदी शास्त्रोक्त पद्धतीने झाला. यावेळी कॅमेरामन तानाजी सणस, कलाकार प्रदीप भिडे, रविंद्र कदम, नरेश पाटील, पुरुषोत्तम पाटील, बालकलाकार उन्मेश सकपाळ, फोटोग्राफर तेजस वायंगावकर आदी उपस्थित होते.चित्रपटाचे लेखन व दिग्दर्शन स्वतः अभिजीत पाटील करणार आहे. राजा कांबळे यांनी चित्रपटाचे संवाद लिहिले असून कलाकार आणि इतर तंत्रज्ञांची निवड होऊन गणेशोत्सवानंतर चित्रपटाचं चित्रीकरण सुरु होणार आहे.
मस्त चाललंय आमचं, गैर, मी सिंधुताई सपकाळ, कदाचित अशा विविध विषयांवरील लोकप्रिय आणि नवीन ब्लॉकबस्टर चित्रपटांचा नजराणा झी मराठीने 'झी मराठी प्रिमीयर' मधून घरबसल्या दिला. आता 'झी मराठी प्रिमीयर' घेऊन येत आहे 'कोण आहे रे तिकडे! ' रविवारी १४ ऑगस्टला रोजी संध्या ७ वाजता.
अंबिका पिक्चर्स निर्मित 'कोण आहे रे तिकडे' या चित्रपटाचे निर्माते आहेत दिपक भोसले आणि दिग्दर्शक आहेत तानाजी एम. घाडगे. अरविंद जगताप यांनी या चित्रपटाची कथा, पटकथा, संवाद आणि गीते लिहीली आहेत तर हृषिकेश कामेरकर यांनी पार्श्वगायन केले आहे. डॉ. मोहन आगाशे,सुबोध भावे आणि शुभांगी गोखले या चित्रपटात मुख्य भूमिकेत आहेत. त्याचबरोबर मोहन जोशी, शरद पोंक्षे, मंगेश देसाई, हेमांगी कवी, स्मिता तांबे अशी तगडी कलाकार मंडळी मजेदार भूमिकेत दिसतील.
'झेंडा' च्या यशानंतर अवधूत गुप्तेंचा 'मोरया' १९ ऑगस्टला प्रेक्षकांच्या भेटीस येत आहे. विषयाचं वेगळेपण आणि तगडी स्टारकास्ट यामुळे हा चित्रपट सर्वांच्या चर्चेचा विषय बनला आहे. या चित्रपटाच्या ध्वनिफीत प्रकाशनाचा सोहळा नुकताच मोठ्या थाटामाटात मुंबईच्या आजीवसन सभागृहात पार पडला. याप्रसंगी सचिन पिळगावकर, एव्हरेस्ट एण्टरटेनमेंट्चे प्रमुख संजय छाब्रिया, चित्रपटाचे निर्माते अतुल कांबळे, कार्यकारी निर्माते हेमेंद्र कुलकर्णी, छायाचित्रकार राहुल जाधव आणि दिग्दर्शक अवधुत गुप्ते यांच्यासह चित्रपटातील कलाकार, गायक आणि तंत्रज्ञांची टिम उपस्थित होती.'ए स्क्वेअर एण्टरटेनमेंट' निर्मित 'मोरया' ह्या चित्रपटात सार्वजनिक गणेशोत्सव मंडळांमधील वैचारिक आणि आर्थिक विरोधाभास, या मंडळांचं अंतर्गत राजकारण आणि संघर्ष प्रेक्षकांना बघायला मिळेल. यामध्ये संतोष जुवेकर, चिन्मय मांडलेकर, दिलेप प्रभावळकर, पुष्कर श्रोत्री, गणेश यादव, परी तेलंग आणि स्पृहा जोशी यांच्या प्रमुख भूमिका आहेत.
शाहीर साबळे यांनी १३ ऑगस्ट १९६६ साली रंगमंचावर आणलेल्या 'आंधळ दळतंय' या मुक्तनाटकाला महाराष्ट्राने उदंड प्रतिसाद दिला आहे. मुंबईतील मराठी माणसाचा प्रश्न या नाटकाद्वारे साबळे यांनी पहिल्यांडा मांडला होता. ४५ वर्षापूर्वी अवघा महाराष्ट्र या नाटकामुळे पेटून उठला होता. शिवसेना स्थापन होण्याला कारणीभूत ठरलेलं हे नाटक तेव्हाच्या सद्य परिस्थितीवर भाष्य करणारे होते. आज भले संदर्भ बदलले असले, तरी परिस्थिती तीच आहे. त्यामुळे या काळातही हे नाटक तितकेच प्रभावी ठरणार आहे. म्हणूनच आता तब्बल ४५ वर्षानंतर तीच धग... तोच जोश घेऊन सुनील बर्वे यांच्या 'हर्बेरिअम' उपक्रमातील चौथ नाटक त्याच तारखेचा बेत साधून १३ ऑगस्टला पुन्हा रंगभूमीवर येत आहे.या नाटकाचे वैशिष्टय म्हणजे शाहिर साबळे यांचे नातू दिग्दर्शक केदार शिंदे याचे दिग्दर्शन करीत आहे. त्याकाळी साबळेंनी वठवलेली सूत्रधाराची भूमिकादेखील केदार शिंदे यात साकारणार असून राजा मयेकर आणि सुहास भालेकर या कलावंतांच्या जागी डॉ. निलेश साबळे व संजय इंगळे ही नवी जोडगोळी दिसणार आहे. यांच्यासोबत प्रिया बेर्डेही यात भूमिका करणार आहे. गण, गवळण, बतावणी, गीते, पोवाडे, नृत्य असे भरगच्च नाट्य असलेला 'आंधळ दळतंय' हे नाटक नक्केच हटके ठरणार असून मयूर वैद्य याचे नृत्यदिग्दर्शन करीत आहेत. नाटकाचे संगीत शाहीर साबळे यांचे असून त्याचे संगीत संयोजन कमलेश भडकमकर करणार आहेत. नेपथ्य प्रदिप मुळ्ये यांचे असून प्रकाश योजना शितल तळपदे यांची आहे.
इंग्रजी, हिंदी, तेलगू, गुजराती, उर्दू अशा अनेक भाषांत अनुवादित आणि साहित्य अकादमीच्या पुरस्काराने गौरविलेल्या 'उचल्या' या कादंबरीने मराठी साहित्यविश्वात खळबळ उडवली. सामाजिक कार्यकर्ते लक्ष्मण गायकवाड लिखित 'उचल्या' या कादंबरीने पिडीत, शोषित समाजाला न्याय मिळवून देण्यासाठी एक चळवळच उभारली. वर्णव्यवस्थेने व समाजव्यवस्थेने नाकारलेल्या या समाजाला शेकडो वर्षे पशुतुल्य जीवन जगण्यास भाग पाडण्यात आले. उपजीविकेची सर्व साधने बंद झाल्यामुळे 'चोरी करुन जगणे' हाच समाजापुढे एक पर्याय राहिला. 'उचल्या' कादंबरीची दाहकता मराठी रुपेरी पडद्यावर आणण्याकरिता निर्माते अमर कक्कड आणि पुष्पा कक्कड यांची 'अक्षरा फिल्मस अँड डिव्हिजन' या निर्मिती संस्थेने या कादंबरीचे हक्क मिळवून यावर मराठी चित्रपट निर्मिती करण्याचे ठरविले असून चित्रपटाचे दिग्दर्शन समित कक्कड करणार आहेत. सप्टेंबर अखेरीस चित्रीकरणास सुरुवात होणार आहे.
'साद' या एम. बी. प्रॉडक्शन प्रस्तुत आणि दिग्दर्शक महेश देशपांडे व महेश राज निर्मित कौटुंबिक चित्रपटाचा मुहूर्त नुकताच संपन्न झाला. हृदयस्पर्शी हळूवार कथानक असलेल्या या कौटुंबिक चित्रपटाला विनोदाची फोडणी दिली आहे. सध्या मराठीत वेगवेगळ्या विषयांवर चित्रपट निर्मिती केली जात असून 'साद' या चित्रपटाचे कथानक एका नाविन्यपूर्ण विषयावर बेतलेले आहे.
या चित्रपटाची कथा महेश राज व पटकथा संवाद आनंद मोरे यांचे आहेत. चित्रपटाचे छायांकन अरुण फसलकर यांचे तर कला दिग्दर्शन राज कांबळे परभणीकर आहे. गीतकार, प्रविण दवणे व विश्वनाथ इवलेकर यांनी गीते लिहीली असून संगीत विवेक अस्ताना यांचे आहे.
या चित्रपटात प्रमुख भुमिकेत सागर तळाशिकर, भुषण कडू, नुतन जयंत, डॉ. सतीश सुर्यवंशी, ज्योती जोशी, आसावरी तांरे, प्रकाश धोत्रे हे कलाकार आहेत. निर्माते आणि दिग्दर्शकांच्या म्हणण्यानुसार हा चित्रपट दिवाळीत प्रदर्शित करण्यात येणार आहे.
'स्वामी तिन्ही जगाचा आई विना भिकारी'. आईच्या मायेची, प्रेमाची, वात्सल्याची कुठही तुलना होऊ शकत नाही. म्हणून दरवर्षी ६ जून रोजी पाश्चात्य संस्कृतीप्रमाणे मदर्स डे जगभर मानला जातो. याच अर्थाचं 'मदर्स डे एक दिवस आईचा' या मराठी चित्रपटाची हेमंत दाभाडे यांनी निर्मिती केली आहे. पुणे, मुंबई येथे व्यवसाय असलेल्या उद्योजक हेमंत दाभाडे यांची हि पहिलीच निर्मिती आहे. ह्या चित्रपटाचे संपूर्ण चित्रीकरण मलेशियात होत आहे. मलेशियात चित्रिकरण होणारा हा पहिलाच मराठी चित्रपट आहे शिवाय यात राधी ही मलेशियन कलाकार महत्त्वपूर्ण भूमिकेत असणार आहे. 'मदर्स डे एक दिवस आईचा' या चित्रपटाची कथा जन्मदाती आई आणि वाढवणारी आई ह्यांच्या वात्सल्यावर आधारित आहे. हिंदी आणि तामिळ चित्रपटांच्या दिग्दर्शनाचा अनुभव असलेले दिग्दर्शक राजू सुब्रमण्यम हा चित्रपट दिग्दर्शित केला आहे. गीतकार आरती सामंत देसाई ह्यांनी लिहिलेल्या गीतांना अनुभवी संगीतकार अरविंद हळदीपूरकर ह्यांनी संगीत दिले आहे. या चित्रपटाची कथा दिग्दर्शक राजू सुब्रमण्यम ह्यांची असून संवाद आनंद म्हस्वेकर ह्यांचे आहेत. साऊथमधील बर्याच चित्रपटांचा अनुभव असलेले कॅमेरामन मंजुनाथ यांनी छायांकनाची जबाबदारी स्विकारली आहे.या चित्रपटात अरुण नलावडे, यतीन कार्येकर, इला भाटे, भाग्यश्री राणे, मयुरेश पवार ह्या कलाकारांसोबत अनलेश देसाई आणि अवंतिका सॅलियन ही नवी जोडी पदार्पण करत आहे.
