लवकरच प्रेक्षकांच्या भेटीस येतोयं 'संसाराची माया'.

'२१ न्यु सेंचुरे फिल्म्स' अंतर्गत पूनम झांवर यांनी 'संसाराची माया' या चित्रपटाची निर्मिती केली आहे. हिंदी चित्रपटसृष्टीमध्ये लोकप्रिय असलेल्या पूनम झांवर यांची ही पहिलीच मराठी निर्मिती असून दिपक कदम यांनी या चित्रपटाचे दिग्दर्शन केले आहे. 'एका लग्नाची गोष्ट', 'अशी ही फसवा फसवी' आणि 'भंडारा प्रेमाचा' या चित्रपटांच्या यशानंतर दिग्दर्शक दिपक कदम यांनी 'संसाराची माया' या चित्रपटाद्वारे आणखीन एक वेगळा विषय हाताळला आहे. या चित्रपटामध्ये योगेश महाजन, मैथिली जावकर, उमेश ठाकूर, महेश कोळी, दीपज्योती नाईक, स्नेहल विलणकर, अक्षिता, स्वप्नील राजशेखर, संजय कसबेकर, कोमल आपके, अभिजीत कुलकर्णी आणि नैना कर यांच्या महत्त्वपूर्ण भूमिका आहेत.

'एक दिवसाची सुहासिनी' चित्रपटाचा मुहूर्त संपन्न......

हिना फिल्म्स, सुयोग म्युझिक फिल्म्स, प्रकाश प्रोडक्शन निर्मित 'एक दिवसाची सुहासिनी' या मराठी चित्रपटाचा मुहूर्त नुकताच मोठया दिमाखात पार पडला. धनाजी पाटील, प्रकाश पाटील, प्रदीप वाघमारे निर्मित या चित्रपटाचे दिग्दर्शन श्रीनाथ पाटील आणि स्वप्निल म्हात्रे करत आहेत. चित्रपटाचे सहनिर्माते सदाकत चौधरी, प्रदीप मोकाशी, वंदना कांबळे, राजा (भाऊ) चव्हाण आहेत.

चित्रपटाची कथा विनोद कांबळी यांची असून चित्रपटात अशोक शिंदे, जयराज नायर, मानसी पाठारे यांच्या प्रमुख भूमिका आहेत. चित्रपटाची विशेष बाब म्हणजे या मराठी चित्रपटातून हिंदी चित्रपटसृष्टीतील एक प्रसिद्ध स्टंट, पर्सनल बॉडी ट्रेनर आणि अभिनेता गेविन पुनरागमन करतोय.

'मी सिंधूताई सपकाळ' आंतरराष्ट्रीय चित्रपट महोत्सवात.

बॉलिवूडमधले दिग्दर्शक अनंत महादेव यांनी दिग्दर्शित केलेल्या  'मी सिंधूताई सपकाळ' या मराठी चित्रपटाची आगामी लंडन फिल्म फेस्टीव्हल आणि एशियन फिल्म फेस्टीव्हलसाठी निवड झाली आहे. समाज सेविका सिंधूताई सपकाळ यांच्या ऑटोबायोग्राफी 'मी वनवासी' वर आधारीत हा चित्रपट परदेशी प्रेक्षकांचे मन नक्की जिंकेल.

या दोन महोत्सवात सादरीकरण झाल्यानंतर हा चित्रपट लवकरच संपूर्ण महाराष्ट्रात प्रदर्शित होणार आहे. बिंदीया खानोलकरांची निर्मिती असलेल्या या चित्रपटाला अशोक पत्की यांचे संगीत आहे. या चित्रपटात तेजस्विनी पंडीत, उपेंद्र लिमये आणि नीना कुलकर्णी यांच्या प्रमुख भूमिका आहेत.

एक आगळा वेगळा 'बोकड' चित्रपटसृष्टीत दाखल होणार.

वाई तालुक्यातील सुप्रसिद्ध उद्योगपती अनिल देव आणि वाईचेच कॅमेरामन मनु सावंत चित्रपटसृष्टीत निर्माते म्हणून पदार्पण करीत आहेत. या दोन वाईकरांनी हेमा फिल्म्सच्या बॅनरखाली 'बोकड' या चित्रपटाची निर्मिती केली आहे. यावेळी वाईचे आमदार मकरंद (आबा) पाटील यांनी मुहुर्ताचा नारळ वाढविला व क्लॅप दिला. या चित्रपटाचे दिग्दर्शन प्रविण राजा कारळे यांनी केले आहे. 

चित्रपटात एकूण २४ गाणी आहेत. चित्रपटाची कथा या गाण्यातून घडून जाते. अशोक बागवे यांनी लिहिलेल्या गीतांना अवधुत गुप्ते यांनी संगीत दिले आहे. स्वतः अवधूत गुप्तेर, स्वप्निल बांदोडकर, स्वानंद किरकिरे, अमृता सुभाष व जान्हवी यांनी या गीतांना आवाज दिला आहे. 

'बोकड' मध्ये सयाजी शिंदे, किशोर कदम, विनय आपटे, प्रिया बेर्डे, अमेय वाघ, राहून साळवे, उदय सबनीस, शरद पोंक्षे, मेघा घाडे आणि मुंबई, पुणे, कोल्हापूर आणि महाराष्ट्रात ऑडिशन घेऊन या महाराष्ट्रातील विविध २० कॉलेजची मुलंमुली यांच्या यात प्रमुख भूमिका आहेत. लवकर या चित्रपटाच चित्रिकरण वाई व मुंबईत होणार आहे. 

तृप्ती भोईरचा आगळा वेगळा प्रयत्न - 'अगडबम'.

'अगडबम' या आपल्या आगामी चित्रपटात अभिनेत्री आणि निर्माती तृप्ती भोईर हिने चित्रपटाच्या कथानकानुसार संपूर्ण चित्रपटात प्रोथेस्टिक मेकअप मध्ये वावरण्याचा एक वेगळाच पराक्रम केला आहे. १ ऑक्टोबर रोजी तिचा 'अगडबम' हा चित्रपट प्रदर्शित होत आहे. 

प्रोस्थेटिक मेकअपचा वापर कमल हसन व अनिल कपूर या कलावंतांनी आत्तापर्यंत केला आहे. या मेकअपसाठी बाहेरच्या देशातून मेकअपमन मागविण्याची पद्धत आहे. पण तृप्तीने आपल्या मराठी मेकअपमनच्या मदतीने हे साध्य करुन दाखविले आहे. संपूर्ण चित्रपटात एका गलेलठ्ठ मुलीची भूमिका ती करत आहे जी लग्नासाठी तयार आहे. 

एक धमाल फँटॅसी म्हणून प्रेक्षक ह्या चित्रपटाकडे पाहणार आहेत, मात्र तृप्तीला या चित्रपटाद्वारे एक वेगळाच विक्रम नोंदवायचा आहे. 'मला बर्‍याच जणांनी हा चित्रपट हिंदीमध्ये करण्यास सांगितले होते, पण माझी इच्छा होती की हा चित्रपट मराठीतच व्हावा. कारण इतरांनीसुद्धा हा मराठी चित्रपट पहावा हीच माझी इच्छा. गरज लागल्यास पुढे हिंदीत डब करु." असे तृप्तीने मराठीमुव्हीवर्ल्डशी बोलताना सांगितले. 

'भाऊचा धक्का' लवकरच महाराष्ट्रात सर्वत्र प्रदर्शित होणार.

निवृत्तीनंतर काय, हा सर्वसामान्यांना पडणारा प्रश्न एस. सी. फिल्म इंटरनॅशनल बॅनरखाली निर्माण झालेला 'भाऊचा धक्का' हा चित्रपट सोडवणार आहे. निर्माती सुनिताताई चव्हाण यांनी या चित्रपटाची निर्मिती केली आहे. विक्की खरात या तरुण दिग्दर्शकाने चित्रपटाचं दिग्दर्शन केले आहे. संदेश चव्हाण या चित्रपटाचे सहनिर्माते आहेत. कथा सदानंद दळवी यांची असून पटकथा व संवाद  राजेश  बामगुडे यांचे आहेत. 

'भाऊचा धक्का' या चित्रपटात मोहन जोशी, सिद्धार्थ जाधव, सतिश तारे, संजय खापरे, मयुरा पालांडे, गौरी सुखटणकर, वैभव मांगले, कुशल बद्रिके, राजेश गाडे, संजीवनी जाधव, कोमल धांदे, आनंद म्हसवेकर यांच्या प्रमुख भुमिका आहेत. लवकरच हा चित्रपट महाराष्ट्रात सर्वत्र प्रदर्शित होणार आहे.

छायाचित्रकार देबू देवधर यांचे निधन

मराठी आणि हिंदी चित्रपटातून आपल्या कॅमेर्‍याची कमाल दाखवणार्‍या छायाचित्रकार शंकर देवधर म्हणजेच देबू देवधर यांचे बुधवारी संध्याकाळी फुफ्फुसाच्या कर्करोगाने ओशिवारा येथे निधन झाले. ते गेल्या सहा महिन्यांपासून आजारी होते व त्यांच्यावर नानावटी रुग्णालयात उपचार चालू होते. ते ६२ वर्षांचे होते. 'फिल्म अँड टेलिव्हिजन इन्स्टिटयूट ऑफ इंडिया' मधून छायाचित्रणाची पदवी घेतली. 

रमाकांत कवठेकर यांच्या 'नागीन' चित्रपटापासून त्यांनी कॅमेरामन म्हणून सुरुवात केली. त्यांनी राज दत्त, अमोल पालेकर, अझिझ मिर्झा, नाना पाटेकर, भिमसेन अशा दिग्दर्शांसोबत काम केलं होत. महाराष्ट्र राज्य पुरस्कार, झी गौरव पुरस्कार, गोवा राज्य पुरस्कार अशा पुरस्कारांचे ते मानकरी होते. 

अलिकडे त्यांनी 'मर्मबंध' या मराठी चित्रपटासाठी काम केले होते. तसेच आगामी 'लाडी गोडी' आणि 'तमाशा' या चित्रपटासाठी सुद्धा त्यांनी छायाचित्रण केले आहे. त्यांनी यापूर्वी सावली (२००७), मातीमाय(२००६), क्षण (२००६), लाल सलाम (२००२), पेहचान (२००५), स्टंप्ड (२००३), ध्यासपर्व( २००१), कैरी(२०००), लेकरु (२०००), सिलसिलाहै प्यार का(१९९९), बनगरवाडी (१९९६), प्रहार (१९९१), लपंडाव (१९९३), शेजारी शेजारी, गाव तसं चांगल, तिन्हीसांजा अशा बर्‍याचशा चित्रपटांचे छायाचित्रण केले होते.